Beste urte batez, eta dagoeneko hiru dira, atsegin handiz aurkezten dut Euskadiko Ekonomia eta Gizarte Arazoetarako Batzordearen (EGAB) Jardueren Memoria. Ezinbesteko gardentasun-ariketa ez ezik ageriko laguntza ere bada, erakundeak gure autonomia-erkidegoko sare instituzionalaren barruan betetzen duen funtzio garrantzitsuari balioa emateko orduan.

Egin-eginean ere, gure lana ezagutarazteko zeregin hau 2025ean lantzen aritu garen gaietako bat izan da, eta, hala, lanean jarraituko dugu, pertsonengandik deskonektatuta egon beharrean, herritar guztientzat funtsezkoak diren gaien inguruan jarduten baitugu. Iaz, gure irizpenen eta egin ditugun beste jarduera batzuen bidez, kezka sorrarazten duten eta kritikoak diren gaietan sakondu ahal izan dugu: etxebizitza, gizarte-babesa edo lana, familia eta norberaren bizitza uztartzea, besteak beste.

Izan ere, EAEko sektore ekonomiko eta sozialen behar-beharrezko parte-hartzea instituzionalizatzen duen kontsulta-organoa gara, eta Jaurlaritzari euskal gizarte zibilaren ahots antolatua helarazten diogu, ñabardura, sentsibilitate eta ikuspuntu guztiak jasota. Azken batean, errealitate sozial eta ekonomikorik agerikoenetik edaten duen baliozko informazio baten berri ematen dugu, indarrean sartuko den araudian eragina izateko eta araudia hobetzeko. Informazio horrek gizarte gisa lagundu behar digu aurrera egiten eta modu justu, kohesionatu eta iraunkorrean hazten.

Atzera begiratzen dugunean, lehenik eta behin, EGABen kontsulta-jarduera nabarmendu behar dut, hori baita legez dagokigun funtsezko eginkizuna. Kontsulta-lan horren bidez, Batzorde honek lagundu egiten du erabaki politikoak, lege eta dekretuetan jasotzen direnak, gizartearen benetako kezka eta beharrizanetara gerturatzen. Gure irizpenek –hori zinez sinesten dut–, Euskal Gizarte Zibilaren ahotsa hobeto entzuteko balio dute gai politikoak erabakitzen diren lekuetan. Horregatik, erakunde hau osatzen duten eragile ekonomiko eta sozialek oso serio hartzen dute EGABen egiten duten lana, eta lerro hauen bidez eskertu beharreko ahalegin eskuzabalak egiten dituzte zeregin hori betetzean.

Aurten onartu ditugun 17 irizpenak ahalegin horren ondorio dira, eta, batez ere, Batzordean parte hartzen duten erakundeen elkarrizketarako eta adostasunerako borondatearen ondorio.

Kontsultatu zaizkigun arau-proiektuei buruzko irizpena emanez, EGABek herritarrak kezkatzen dituzten gai askotan parte hartzeko aukera izan du.

Hala, aurten, erronka demografikoari erantzuteko eta izaera sozialeko dekretu askori buruzko irizpena eman dugu (genero-indarkeriaren biktima diren emakumeentzako laguntzak; gizarte-larrialdietarako laguntzak; seme-alabak dituzten familientzako laguntzak; bizitza pertsonala, familia eta lana uztartzeko laguntzak). Euskadi 2030 Industria Planari buruz ere eman dugu irizpena, bai eta turismoarekin, landa-garapenarekin, enplegu-zerbitzu publikoekin edo kooperatibekin lotutako zenbait dekreturi buruz ere, jorratutako gai batzuk aipatzearren.

Irizpen-jarduerak, jakina, Batzordearen agendaren zati handi bat hartu du, baina ñabartu beharra dago ez duela inola ere agortu.

Gizartea kezkatzen duten auzietan presente egoteko bokazio horri gagozkiola, beste zeregin batzuk ere bete ditugu. Horien artean, jorratutako gaiagatik nabarmendu nahi dut ekainaren 2an Bilboko Euskalduna Jauregian egin zen etxebizitzaren erronkari buruzko jardunaldia. Bertan, Denis Itxaso Etxebizitza eta Hiri Agendako sailburuak eta mundu profesional eta akademikoko zenbait adituk hartu zuten parte. Ikuspegi transbertsal eta oso pluraleko topaketa horretan, hainbat ikuskera jaso ziren, bai kausei buruz, bai etxebizitzak botere publiko guztiei mahai gainean jarritako erronkari eman dakizkiokeen irtenbideei buruz.

Hasierara itzuliz, alegia EGAB eta haren eginkizunak ezagutarazteko eta balioesteko eginkizunera, iaz, bigarren aldiz jarraian, udako ikastaro bat antolatu genuen Euskal Herriko Unibertsitatearekin batera; horrek lagundu zuen erakunde honek egiten duen lanik garrantzitsuenetako bat zabaltzen: gure autonomia-erkidegoaren urteko egoera ekonomiko eta sozialari buruzko memoria egitea.

Memoria hori Euskadiko benetako “entziklopedia sozioekonomiko” gisa eratzen da ekitaldi bakoitzean. Gaien zabaltasunak, soilik iturri ofizialak erabiltzen dituen tratamendu zorrotzak eta gure gizarte zibilaren ordezkaritza oso eta zabal gisa eratzen den erakunde batek lantzeak balio bereizgarria ematen diote EGABen Memoria Sozioekonomikoari, antzeko beste lan batzuekin erkatuz gero.

Bestalde, 2025ean Euskadiko EGABen osoko bilkuran Jaurlaritzako arduradunek egindako agerraldiak nabarmendu eta eskertu nahi ditut. Hala, joan den urtean, honakoak bertaratu ziren gure osoko bilkuretara: Mikel Torres bigarren lehendakariordea eta Ekonomia, Lan eta Enplegu sailburua; Mikel Jauregi, Industria, Trantsizio Energetiko eta Jasangarritasuneko sailburua; Denis Itxaso, Etxebizitza eta Hiri Agendako sailburua; Nerea Melgosa, Ongizate, Gazteria eta Erronka Demografikoko sailburua; eta Noël d’Anjou, Ogasun eta Finantzetako sailburua.

Agerraldi horiek Euskadiko EGABen eta Eusko Jaurlaritzako sailen arteko elkar ezagutza zabaltzeko modu bat dira, eta Batzordeak erakundeen aldetik duen aintzatespen-maila handia erakusten dute, urte askoan behar bezala egindako lanaren emaitza.

Azkenik, baina ez horregatik inolako garrantzirik kendu gabe, estatuko eta Europako beste erakunde batzuekin ditugun harremanak aipatu eta nabarmendu behar dira, bai baitakigu jakin herri eta gizarte gisa mahai gainean ditugun erronkak globalak direla eta, beraz, desafioei albait modurik zabalenean heldu behar zaiela. Zentzu horretan, garrantzizkoa da aipatzea 2025. urtearen hasieran Atlantikoko Sare Transnazionalaren barruan (AST) Atlantikoko Makroeskualdea sortzeko proiektuari ekarpena eta babesa emateko dokumentu bat onartu zela. Lan hori ASTeko lantalde batek eginagatik ere, haren buru izateko pribilegioa izan nuen, EGABeko presidente gisa.

Izan ere, Arku Atlantikoa eremu geopolitiko transnazionala da, ekonomia-, gizarte- eta ingurumen-erronka komunei aurre egin behar diena, EBren periferia bihurtzeko joera izan arren. Eskualde atlantikoaren egoera periferiko hori arriskua ez ezik, paradoxikoki, abantaila ukaezina ere bada, horrek berekin baitakar Atlantikorako (Erresuma Batua, Irlanda, Amerika) eta Afrikarako leihoa zabalik izatea; azken hori, ezbairik gabe, maila estrategikoan indartu beharreko alderdia da.

Arlo horretan, Akitania Berriko CESERekin ditugun aldebiko harremanak lantzen jarraituko dugu, horiek sakonduz eta indartuz.

Azken batean, 2025eko Jardueren Memoria gure erakundearen lana ezagutarazteko gonbidapena da. Erakunde honek entzun, hitz egin eta partaidetza bideratzeaz gain, ekarpenak ere egiten baititu euskal gizartearekiko konpromisotik eta zorroztasunetik abiatuta. Memoriaren orrialdeetan kontsentsuaren balioa, begiraden aniztasuna eta herritarren benetako kezkei lotutako politika publiko hobeak bultzatzeko borondatea islatzen dira.

Horrela, Euskadiko EGABek berretsi egiten du zerbitzu publiko gisa duen bokazioa, bai eta Euskadi bidezkoago, kohesionatuago eta iraunkorrago baterantz aurrera egiteko ezinbesteko topagune gisa betetzen duen zeregina ere.

Javier Muñecas Herreras
Euskadiko Ekonomia eta Gizarte Arazoetarako Batzordeko presidentea.

JARDUEREN TXOSTENA 2025

The post Jardueren Txostena 2025 appeared first on CES Vasco.

Jardueren memoria honetan, Euskadiko Ekonomia eta Gizarte Arazoetarako Batzordeak 2024an egindako jarduketak jasotzen dira. Ekitaldi hori, neurri batean, baldintzatuta egon da gure autonomia-erkidegoan hauteskunde-urtea izan delako. Egoera horrek, normalean, legeria-jarduera txikiagoa izatea ekarri ohi du, eta, ondorioz, batzordeak egindako irizpenen kopurua murriztea. Hala ere, oraingo honetan, EGABen jarduera-maila ez da murriztu, gure kontsulta-eginkizunari, hamahiru irizpen ematea ekarri duenari, dokumentu honetan ikus daitekeen jarduera-agenda handia gehitu zaiolako. Jarduera horien artean esanguratsuena EHUn udako ikastaro bat egitea izan da, Donostiako Miramar Jauregian. Ikastaro horren helburu nagusia gure EGABek urtero egiten duen Euskadiko egoera ekonomiko eta sozialari buruzko memoria zabaltzea eta balioestea izan zen. Gure Memoria Sozioekonomikoa urtero finkatutako eta esperotako dokumentua da, gure autonomia-erkidegoaren egoera sozial eta ekonomikoaren ikuspegi osoa eta zorrotza eskaintzen duelako. Ikuspegi hori iturri ofizialetatik soilik datozen datuetatik abiatuta egiten da, eta horrek bere seriotasuna eta zorroztasuna bermatzen ditu.

Nire ustez tresna oso erabilgarria da, eta horregatik garrantzitsua da ahalik eta zabalkunderik handiena lortzea, eta, zalantzarik gabe, hori lortzeko ezinbestekoa izan da aipatutako udako ikastaroa, parte-hartzaile asko egon baitira eta oihartzun asko izan baitu. Gure asmoa hurrengo urteetan ikastaro honen ospakizuna sendotzea da.

(Jardueren Txostena 2024)

The post Jardueren Txostena 2024 appeared first on CES Vasco.

Ekitaldi honetan, Euskadiko Ekonomia eta Gizarte Kontseiluak Kontseiluko eta Zuzendaritzako kideen berritze arrunta eta bere eginkizunetan egindako jarduera zabala uztartu behar izan ditu. Egoera geopolitikoak, Ukrainako gerraren enkistamenduarekin eta Gazako gatazkarekin, ziurgabetasun sozioekonomikoa areagotu du, eta inflazio baten lekuko izan ahal izan gara, krisi belikoek bezala, atsedenik eman ez diguna.

Hori guztia islatu da Eusko Jaurlaritzak gure balorazioa egiteko eskatu zituen proiektuetan. Proiektu horien artean, nabarmentzekoak dira gizarte-estaldura handitzeko proiektuak, prezioen igoeraren aldean, garrantzi handiko eta gizarte-inpaktuko gaiei buruzkoak, bai eta Diru-sarrerak Bermatzeko Errentaren Erregelamendua onartzeko dekretu-proiektuak, seme-alabak dituzten familientzako laguntzei buruzkoak, edo gizarte-bonu termikoaren kudeaketa, ebazpena eta ordainketa arautzen dituztenak.

Sektore publikoa hobetzeko arauei buruz ere galdetu digute, hala nola Euskal Sektore Publikoa Arrazionalizatu eta Dimentsionatzeko Erakunde arteko Batzordea arautzen duen Dekretu-proiektuari eta Euskadiko Gardentasunari buruzko Legearen Aurreproiektuari buruz. Azken hori oso garrantzitsua da gobernu irekiaren kultura bultzatzeko, herritarren parte-hartzea areagotzeko eta arduradun politikoek gizartearen aurrean kontuak ematen dituztela bermatzeko.

Gainera, beste bi lege-aurreproiekturi buruzko irizpena eman da: Euskal Herriko Hezkuntzari buruzkoa eta Lankidetza eta Elkartasunari buruzko Euskal Legeari buruzkoa.

Egin dugun ohiko berritzeak, non LAB sindikatua erakundera itzuli dela azpimarratu dugun, ez du eraginik izan Kontseiluak 2023an garatu duen jarduera bizian; hamazazpi irizpen eman dira, gehienak lehen seihilekoan, eta uztailean jendaurrean aurkeztu den Memoria Sozioekonomikoa egin da.

Jarduera instituzionalari dagokionez, Ekonomia eta Gizarte Kontseiluek eta Espainiako Ekonomia eta Gizarte Arazoetarako Batzordeak Bilbon egindako urteroko topaketan jardun genuen anfitrioi gisa. Topaketa hori Atlantikoko eta Mediterraneoko trenbide-korridoreei buruzko konferentzia baterako esparru izan zen.

Azkenik, iaz Sare Transnazional Atlantikoan parte hartzen jarraitu genuen. Urte amaieran, Bordelen egindako topaketa batean, presidentza aldatu zen, Extremadurako CES zen eta hortik aurrera Bretainiako CESR izan zen. RTAri dagokionez, sarearen funtzionamendua hobetzeari buruzko gogoeta-urtea izan da aurtengoa, funtsean. RTA osatzen duten lurralde bakoitzarekin loturak estutzeko, Arku Atlantikoko eskualde europarren lankidetzaren partaide izateko eta korridore atlantikoak dakarren proiektu komuna aktiboki bultzatzeko aukera ematen digun foroa da.

Javier Muñecas Herreras

Euskadiko Ekonomia eta Gizarte Arazoetarako Batzordearen Presidentea

(Dokumento osoa eskuragarri)

The post Jardueren Txostena 2023 appeared first on CES Vasco.

2022an COVID-19a egonkortu zen eta maskarak eguneroko bizitzan bigarren mailan egotera igaro ziren. Pandemiak atseden bat emango zigula ematen zuenean, beste agerraldi bat azaldu zen: inflazioa. Pandemiaren astinduak eta Ukrainako gerraren ondorioz eratorritako arrisku geopolitiko berriek kolokan jarri zituzten aurreikuspen sozioekonomikoak eta ziurgabetasun mailak gora egin zuen.

Testuinguru horretan, Euskadiko Ekonomia eta Gizarte Arazoetarako Batzordeak bere jarduera erabat berreskuratu zuen. Akitania Berriko CESER-ekin bilerak eta jarduketak indartu zituen, bereziki, baita Arku Atlantikoko beste kontseilu batzuekin ere.

Baina, zalantzarik gabe, kontsulta jarduera, hau da, Batzordearen xedea izan zen 2022an Kontseilu honetan bultzadarik handiena jaso zuen jarduera. Hamasei irizpen eman ziren garrantzi eta eragin sozial handiko gaiei buruz, hala nola Trantsizio Energetikoaren eta Klima Aldaketaren Legearen Aurreproiektua, 2021-2024 Enplegu Plan Estrategikoa edota Enpleguaren Euskal Legearen Aurreproiektua. Hiru horiek interes handiko ekimen legegileak dira Euskadiko hainbat kolektiborentzat. Interesekoak dira baita ere Haur eta Nerabeen Legearen aurreproiektuan jasotakoak. Kontseiluak 2022ko irailean eman zuen horri buruzko irizpena.

Beste plano batean, azpimarratu behar da hamalau urtetik beherako seme alabak zaintzeko langileak kontratatzeko laguntzei buruzko Dekretu Proiektuari buruzko irizpena. Bertan, Batzordeak errepikatu zuen familia politikak ikuspegi integralago baterantz eraldatu eta aurrera egin behar dutela, bai eta beste kontziliazio neurri eta baliabide batzuk aztertu ere. Premia horrek ahalbidetuko du, besteak beste, modu eraginkorragoan jorratu ahal izatea aurre egin behar dugun erronka demografikoa.

Irizpena emateko jardueraz harago, Euskadiko Ekonomia eta Gizarte Arazoetarako Batzordeak urteko memoria sozioekonomikoa egiteko legezko agindua bete zuen, eta uztailean aurkeztu zen jendaurrean memoria hori.

Gainera, EBko esparruan, gizarte eta ekonomia politiken inguruko hainbat jardunaldi ospatu ditu Europako EGAB eta España EGAB lankide izan dituela. Gainera, Atlantikoko Sare Transnazionala hartu du (Espainiako eta Frantziako zenbait kontseilu ekonomiko eta sozialek osatzen dute, Euskadikoak barne). Amaitzeko, Atlantikoko korridoreari eta Europa barneko garraio sarea berrikusteko prozesuari buruzko azterlana egin du. Azterlan horretan, Atlantikoko Sare Transnazionalak zortzi proposamen egin ditu eta Europako Batzordeak aurkeztutako Europa barneko Garraio Sarea berrikusteko proposamenarekin alderatu ditu, Arku Atlantikoko Europako eskualdeen lankidetzarako gako gisa.

The post Jardueren Txostena 2022 appeared first on CES Vasco.

2021. urtea gorabehera eta ziurgabetasun urtea izan da, baina baita itxaropen urtea ere. COVIDa bigarren urtez gure artean izan arren, eta pandemiak eragiten jarraitu duen astinaldia gorabehera, badira era positiboan nabarmendu diren gai aipagarriak. Garrantzitsuena, itxaropenari atea letra larriz ireki ziona, txertoa izan da. Guri helarazteko izan den osasun-kudeaketa goraipagarriari eta herritarren onarpen ezin nabarmenagoari esker, aurre egin ahal izan zaio urte honi (izan dituen eragozpen guztiak gorabehera, pandemiaren ondorengo etorkizunari dagoeneko aurrez aurre begira jarri den urteari).

Hala eta guztiz ere, ez dago memoriarik, ez kudeaketa txostenik, ez publikorik, ez pribaturik, birusak gure artean bigarren urtez eragin dituen kalteetatik aldendu daitekeenik. Hala ere, nahiz eta osasun-larrialdiko testuinguru zaila izan, Euskadiko Ekonomia eta Gizarte Arazoetarako Batzordeak ahalik eta normaltasun handienaz garatu ditu bere eginkizunak, COVIDak urtean zehar izan duen eraginaren araberako testuinguru aldakor baten baitan.

2021ean nabarmen berreskuratu da irizpenak emateko jarduera; hori da Batzordearen eginkizun nagusia. Euskadiko EGABek garrantzi handiko eta eragin sozial handiko esparruetan eman zuen iritzia, hala nola Eusko Jaurlaritzako Osasun Sailak egindako Gobernantza Soziosanitarioaren Dekretu Proiektuan eta Euskadiko Osasun Publikoaren Aurreproiektuan; edo Diru-sarrerak Bermatzeko eta Gizarteratzeko Euskal Sistemaren Lege Aurreproiektuan (kasu horretan, Eusko Jaurlaritzako Lan eta Enplegu Sailak idatzitakoan). EAEko biztanleriaren kolektibo zabalentzat interes handikoak diren legegintza-ekimenen hiru adibide dira. Euskal Autonomia Erkidegoko etxebizitzen eta zuzkidura-bizitokien gutxieneko bizigarritasun-baldintzak arautzen dituen dekretu proiektuan jasotako berrikuntzak ere badira horien adibide. Batzordeak 2021eko maiatzean eman zuen proiektu horren gaineko irizpena.

Beste maila batean, lege-aurreproiektuari buruzko irizpena ere nabarmendu zen Euskadiko Memoria Historiko eta Demokratikoa bezalako gai sentikor batean. Bertan, Batzordeak onartzen zuen erakundeen ekintza funtsezkoa dela Memoria babesteko, gertatutakoari buruzko gogoeta eginez eta belaunaldi berrientzat eskuragarri eginez, askatasunen egungo esparruko lorpenak babesteko eta lorpenaren alde borrokatu zirenen sufrimendua aitortu eta balioesteko.

Irizpen-jardueraz haratago, Euskadiko Ekonomia eta Gizarte Arazoetarako Batzordeak urteko memoria sozioekonomikoa egiteko lege-agindua bete zuen. Memoria hori uztailean aurkeztu zen jendaurrean, eta, horrela, pandemiaren aurreko garaiak eta moduak berreskuratu ziren.

Azkenik, eta ezaugarri bikain gisa, 2021ak aukera eman du, Espainia eta Frantziako fatxada atlantikoko batzorde ekonomiko eta sozialen arteko harremanaren esparruan, pandemiaren ondorioengatik 2020an murriztutako jarduera baten erritmoari berriro ekiteko. Batzorde horiek osatzen duten Sare Transnazional Atlantikoak hainbat gomendio eman ditu Atlantikoko Korridorearen ezarpena bultzatzeko, eta gomendio horiek “Espazio atlantikorako TEN-T delakoaren berrikusketarantz” txostenean jaso dira. Ekarpen horrekin, Sare horretan sartutako ekonomia eta gizarte arazoetarako batzordeek indartu egin nahi izan dute eskualdeaz gaindiko dimentsioa izanik gure lurralde bakoitzean eragin handia eta zuzena duten gaietan elkarrekin lan egiteko konpromisoa

The post Jardueren Txostena 2021 appeared first on CES Vasco.

Osasun-larrialdiaren ondoriozko salbuespenarekin batera, beste aldaera batek baldintzatu du 2020ko ekitaldia EGABren kasuan. Aldaera hori oso bestelakoa izan da, guztiz berezkoa baita gurea bezalako gizarte demokratikoetan: hain zuzen ere, hauteskunde autonomikoen zita uztailean. Hauteskunde konpromiso orok legegintza-jardueraren geldiera dakar, eta moteltze hori erreleboak behar duen denboraldian luzatzen da, arduradun politiko berriek lanari berrekin arte. Egoera horrek zuzenean eragiten dio Ekonomia eta Gizarte Arazoetarako Batzordeak duen funtsezko eginkizunari: irizpenak ematearen zereginari.

Eusko Jaurlaritzaren eta Eusko Legebiltzarraren erakunde aholku-emaile instituzionala izanik, EGABek lege-proiektuak jasotzen ditu, Kontseilua osatzen duten eragile ekonomiko eta sozial guztiek ikuskatu ditzaten. Dokumentuok zehatz-mehatz aztertu eta eztabaidatzen dira, erantzun-irizpenetan jasotzen diren hobekuntza-proposamenak, baldin badaude bateratzea lortu arte. Irizpen horien funtsezko balioa, Kontseilua osatzen duten eragile sozial eta ekonomikoek adostutako gogoetetan datza. Gogoeta horietan, Euskadiko ekonomia eta gizarte politikan interes ekonomiko eta sozial desberdinen parte-hartzea de facto eraginkorra egiteko proposamenak aipatzen dira.

Aipatu bezala, hauteskunde autonomikoen ospakizunak -hasiera batean apirilerako aurreikusita- uztailean Euskadiko Ekonomia eta Gizarte Arazoetarako Batzordearen irizpen-zereginaren murrizketa ekarri zuen, eta, beraz, Memoria honetan jasotako arlo horretako jarduera beste ekitaldi batzuetakoa baino kuantitatiboki nabarmen eskasagoa da. Horrek ez du esan nahi garrantzi gutxiagoko gaiak zirenik; izan ere, garrantzi handikoak diren eta guztioi eragiten dizkiguten esparruei buruzko iritziak eman zituen Kontseiluak. Hala nola, Klima Aldaketari buruzko Euskal Legearen aurreproiektuari buruzko irizpena eman zuen, Klima Ekintzetarako Itun Soziala bultzatzea proposatuz, Nazio Batuen Garapen Iraunkorreko eta Garapen Jasangarrirako helburuekin bat etorrita. Gure gizartea kezkatzen duten beste gai batzuei buruz ere aritu ginen, etxebizitza arloan esate baterako, jenderik gabeko etxebizitzen proiektu arautzaileari buruzko irizpenarekin, edo landa-garapenaren esparruan, arloko lege-aurreproiektuarekin, besteak beste.

Irizpenak emateko eginkizunaz gain, 2020rako Jardueren Memorian aurreko irizpenoi egindako jarraipena ere jasotzen da, gure iradokizunen eragina neurtuta, bai eta Kontseiluaren barne-organoek ezohiko urte horretan egindako lanen eta bileren berri ere ematen da. Pandemiak behartu gintuen lan telematikoaren baldintzetara egokitzea eta hori EGABen gaitasuna ere aztertzeko froga bilakatu zen (konfinamendua, telelana, bideokonferentziaren bidezko bilerak…). Azterketa notaz gainditu genuela esan genezake, egin genituen Osoko Bilkuraren hamaika bilerek, Batzorde Iraunkorraren bederatzi batzarrek, Memoria Sozioekonomikoa idazteaz arduratzen den Batzordeak egindako hamabik edo Batzorde Ekonomikoak eta Gizarte Batzordeak egindako zita telematikoek ondo erakusten digutenez.

Amaierarako utzi nahi izan dut Euskadiko Ekonomia eta Gizarte Arazoetarako Batzordearen 2020. urteko jarduerarik esanguratsuena, gainerakoak baztertu gabe. “COVID-19k Euskadin duen eraginari buruzko hurbilketa” izeneko ekimen propioaren azterlanaz ari naiz. Lan horretan, gure autonomia erkidegoko ekonomia eta gizarte esparruetan SARS-CoV-2 izan duen eragina lehen hilabeteetan aztertzen da, pandemiari aurre egiteko erakundeek eman dituzten erantzunak bilduz eta ondorioz ditugun erronkei buruzko hausnarketak eginez. Ikerketa honen bidez gure karpen xumea egin diogu pandemiak Euskadiko Autonomia Erkidegoan jarri digun erronkari.

Emilia M. Málaga Pérez

Euskadiko Ekonomia eta Gizarte Arazoetarako Batzordearen Presidentea

The post Jardueren Txostena 2020 appeared first on CES Vasco.