Eusko Jaurlaritzako Ekonomiaren Garapen, Jasangarritasun eta Ingurumen Sailak egindako “Ingurumenerako Aholku Kontseiluaren osaera, kideak izendatzeko prozedura, antolamendua eta funtzionamendua arautzen dituen Proiektu-Dekretuari” buruzko txostena igorri du Euskadiko Ekonomia eta Gizarte Arazoetarako Batzordeak. Bere erantzunean, EGABek beharrezkotzat jotzen du araua berregitea, irizpenean adierazitako funtsezko gaiak kontuan hartuta.

Dekretu Proiektuaren helburua 2021eko Euskadiko Ingurumen Administrazioaren Legean orokorrean definitu zen Ingurumenerako Aholku Kontseiluaren osaera zehaztea da, bai eta kideak izendatzeko prozedura, antolaketa eta funtzionamendua arautzea ere. Ildo horretan, Euskadiko EGABek ohartarazi du arauak ez duela Ingurumenerako Aholku Kontseiluaren osaera behar bezain zehatz eta argi zehazteko, ezta kideak izendatzeko irizpideak erabakitzeko helburua betetzen.

Kontuan hartu beharreko funtsezko gaiei eta organoaren osaera zehazteari dagokienez, EGABek uste du arauak Ingurumenerako Aholku Kontseiluko kideak ordezkaritza handieneko enpresa- eta sindikatu-erakundeetako kide izatea ezarri behar duela. Era berean, beharrezkotzat jotzen du, parekidetasunari eutsiz, enpresetako eta sindikatuetako ordezkarien kopurua berrikustea, eta ordezkaritza eskuratzeko eta banatzeko irizpideak definitzea, bere baitan interes desberdinak eta sektore anitzekoak modu ekitatiboan hartuko dituen zeharkako kontsulta-organoa eratzeko helburuarekin.Zehazki, EGABek ordezkarien kopurua gorantz berrikustea iradoki du, ezarritako kopurua, bai enpresa-elkarteentzat, bai sindikatuentzat, hiru pertsonakoa dela kontuan hartuta, eta Euskadin ordezkaritza handia duten lau sindikatu daudela ikusita. Gainera, EGABek ingurumenean espezializatutako erakundeek parte hartzea gomendatzen du, Ingurumenerako Kontseiluaren lana aberasteko.

Bestalde, EGABek Dekretu-Proiektuaren justifikazio-memorian Ingurumenerako organo aholku-emailearen osaeraren justifikazioa, ordezkaritza-motak eta ordezkatutako erakunde zehatzak, horietako bakoitzeko kide-kopurua, eta kide horiek izendatzeko eta batzordeburua izendatzeko irizpideak sartzea beharrezkotzat jotzen du, arauaren izapidetzearekin batera doan txosten juridikoak jasotzen duen bezala.

Ingurumenerako Kontseiluaren funtzionamenduari dagokionez, EGABek uste du arauak, organoaren funtzionamendu egokia bermatuko duen gutxieneko edukia jaso eta batzordeak edo lantaldeak eratzeari buruzkoa zehaztu beharko lukeela. Horiei dagokienez, EGABek urtero egin beharreko/gutxieneko bilera kopurua handitzea iradokitzen du (gaur egun hiru dira), datozen urteetan ingurumenarekin erlazionatuta sortuko diren gai interesgarri ugariak kontuan hartuta.

The post EGAB-ek ingurumenerako aholku kontseiluaren osaera eta funtzionamendua arautzen duen proiektu-dekretuari buruzko irizpena eman du appeared first on CES Vasco.

Eusko Jaurlaritzako Segurtasun Sailak prestatutako “Suteen prebentzio eta itzalketako eta salbamenduko zerbitzuen Lege-Aurreproiektuari” buruzko txostena egin du Euskadiko Ekonomia eta Gizarte Arazoetarako Batzordeak. Erantzunean, EGABek egokitzat jo du izapidetzea, eta aztertutako testua hobetzeko ohar-zerrenda bat gehitu du.

Euskal kontsulta-organoaren iritziz, egokia da zerbitzu horiei lege-mailako araudi propioa ematea. Araudi horren helburua Euskadin suteak prebenitzeko eta itzaltzeko eta salbamendurako jarduerak antolatzea da, bai eta euskal administrazio publikoen eta bertako langileen izaera horretako zerbitzuak arautzea ere, euskal lurraldean zerbitzu horiek emango direla bermatzeko, eta zerbitzu horiek elkarrekin eta koordinatuta eta beste larrialdi-zerbitzu batzuekin batera ematea ahalbidetuko duten mekanismoak aurreikusteko.

Oharrei dagokienez, Kontseiluak beharrezkotzat jotzen du koordinazio- eta lankidetza-mekanismoak arautzeari buruzko artikuluak berrikustea. Zehazki, suteen prebentzio eta itzalketako eta salbamenduko zerbitzuetarako Erakunde arteko Batzordearen eginkizunak arautzen diren baldintzak gainbegiratzea iradokitzen du, baita enpresan suhiltzaileak edo auto-babeserako ekipamenduak dituzten enpresekiko lankidetza-mekanismoak ere. Horrela, EGABek, Administrazio publikoek zerbitzuak emateko behar diren medio teknikoen eta baliabideen nahikotasunaren balorazioa Erakunde arteko Batzordearen eginkizunen artean sartzea gomendatzen du, eta prebentzio-zerbitzuak, suteak itzaltzeko zerbitzuak edo salbamendu zerbitzuak dituzten enpresetako langileen esku-hartzea garatzea iradokitzen du.

Era berean, Kontseilua kezkatuta agertu da araudiak ez duelako egitura profesional berrira egokitzearen eragina jasotzen duten plantillen ordainsarien baldintzetan gastu publikoa handitzea aintzat hartzen, eta ez du hori ulertzen. Hori dela eta, gai horrek arauan duen esanahia azaltzea eskatzen du.

Langileen kategoriei eta sailkapen-taldeei dagokienez, kontsulta-organoak onartu egin du suhiltzaile boluntarioaren eta suhiltzaile laguntzailearen figurak desagertzea, eta sarjentu kategoria sailkapeneko B taldean sartzea gomendatu du, aginte-eskalan proportzionaltasunari eusteko ratio-irizpidea txertatzeaz gain. Era berean, ohartarazten du Zerbitzuek prebentzioaren inguruan duten zeregina zehaztu barik dagoela, eta ez dagoela Karrera Profesional horizontalaren garapenari buruzko erreferentziarik. Gai horri dagokionez, Euskal Autonomia Erkidegoko Poliziari buruz indarrean dagoen Legea erreferentziatzat hartzea iradokitzen du.

The post Euskadiko EGAB-ek suteen prebentzio eta itzalketako eta salbamenduko zerbitzuen Lege-aurreproiektuari buruzko irizpena eman du appeared first on CES Vasco.

Euskadiko Ekonomia eta Gizarte Arazoetarako Batzordearen azken osoko bilkurak berretsi egin ditu Enpleguaren Euskal Lege-aurreproiektuari eta Gizarte Zerbitzuen Euskal Sisteman itun sozialaren eta hitzarmenen araubidea arautzen dituen Dekretu-proiektuari buruz organo aholku-emaile horrek emandako bi irizpen. Hurrenez hurren, Lan eta Enplegu Sailak eta Berdintasun, Justizia eta Gizarte Politiketako Sailak egindako testuei buruzko irizpenak dira.

Enpleguaren Euskal Lege-aurreproiektuari buruzko 15/22 Irizpenean, Kontseiluaren ustez aurreproiektua izapidetzea egokia bada, eta Euskal Enplegu Sistema osoa antolatzeko eta arrazionalizatzeko egiten duen ekarpena positibotzat jotzen badu ere, zenbait gogoeta sartzen ditu, aztertutako testua hobetzeko proposamenak, besteak beste.

Arauaren xedea, pertsonek enplegagarritasuna hobetzeko dituzten eskubideak eta betebeharrak eta botere publikoek enplegu-politiken arloan jarduteko dituzten printzipioak zehaztea, Enpleguaren Euskal Sarea sortzea eta enplegagarritasuna hobetzeko zerbitzu-zorroa eta programa osagarriak antolatzea eta kudeatzea da. Halaber, enpleguaren arloko eskumenak, gobernantza-eredua, enplegu-politika publikoen plangintza, parte-hartzea eta finantzaketa zehazten ditu, eta Euskal Enplegu Zerbitzua (Lanbide) arautzen du.

Euskadiko EGABen iritziz, arauak administrazio publikoen, enpresen eta erabiltzailearen erantzunkidetasuna antolatzen eta sustatzen laguntzen du, eta positibotzat jotzen du azken hori “objektu” izatetik politika publikoen “subjektu aktibo” izatera igarotzea. Gainera, politika publikoak diseinatzean eta gauzatzean kontzertazioari eta elkarrizketa sozialari emandako garrantzia nabarmentzen du. Ildo horretan, balioa ematen dio eragile ekonomiko eta sozialek arauaren prestaketan duten parte-hartze zabalari, eta arauaren gobernantzaren egitura egokitzat jotzen du.

Irizpenean jasotako gogoetei dagokienez, EGABek positibotzat jotzen du Enpleguari buruzko Legeak Elkarrizketa Sozialerako Mahaia lege-mailako araudi izatera igotzea, baina Mahaiaren funtzionamendua arautzen duen araua eguneratzen aurrera egitea gomendatzen du, gizarte-eragileei ematen zaien eginkizuna argiago eta garatuago gera dadin.

Eskumenen esparruari dagokionez, Kontseiluak ohartarazi du aurreproiektuak foru-aldundiei eta udalei oso eskumen-esparru zabala emateak zaildu egin dezakeela udalak tokiko enplegu-politikak garatzea. Gainera, adierazi du horiek ez direla beti aktiboenak enplegu-politika aktiboetan, eta enplegu guztiak ez duela tokiko dimentsioa. Era berean, euskal organo aholku-emaileak uste du enplegu-zerbitzu jakin batzuen prestazioa deszentralizatzeak eta tokiko dimentsioari enplegu-politika publikoen diseinuan eta kudeaketan parte-hartze handiagoa emateak, Enplegu Zerbitzu Publikoari dagozkion eskumenak eta alderdiak ezabatu eta haren funtzioak desitxuratu ditzakeela. Esparru horretan, enplegu- eta gizarteratze-politikak ebaluatzeko, ikertzeko eta berritzeko organo berria eta Enpleguaren Euskal Sarea definitzea gomendatzen du.

Prestakuntza enplegu-politika aktibo gisa hartzeari dagokionez, EGABek adierazi du arauak ez duela behar adina islatzen arlo horretako prestakuntzak duen garrantzi estrategikoa, eta legean langileen prestakuntza gehitzea iradoki du, bai eta “laneko prestakuntza” esamolde okerraren ordez “lanerako prestakuntza” ezartzea ere. Era berean, beharrezkotzat jotzen du Euskal Enplegu Zerbitzuak prestakuntza-eskaintza egonkorra bermatzea, pertsonen eta enpresen beharrak eta epe labur, ertain eta luzerako produkzio-egituraren bilakaeraren agertokiak kontuan hartuta, eta langileen eta enpresen prestakuntzarako esparru komun bat arautzea iradokitzen du.

Euskal Enplegu Zerbitzuari (Lanbide) dagokionez, EGABek positibotzat jotzen du Eusko Jaurlaritzak, Euskal Enplegu Zerbitzua zuzenbide pribatuko erakunde publiko gisa definitzea erabakita, arlo horretan malgutasun, dinamismo eta espezializazio handiagoa bilatzea. Hala ere, Kontseiluak uste du lege horrek Erakundearen hiruko eredua eta Administrazio Kontseiluaren egungo egitura eta osaera finkatu behar dituela, organoaren forma juridikoa edozein dela ere. Legean Lanbideren funtzioak eta gobernantza-eredua zehaztu behar badira, EGABek uste du ahalik eta gehien egokitu beharko liratekeela haren estatutuetara, gizarte-eragileekin adostu baitziren.

Era berean, EGABek azpimarratu du garrantzitsua dela zerbitzua behar bezala emango dela bermatuko duten baliabide nahikoak izatea, eta berriro ere esan du eskura dauden baliabide errealak, giza baliabideak eta baliabide materialak eskumen-zamarekin orekatu behar direla. Batez ere, kontuan hartuta Lanbidek politika pasiboak ere kudeatu beharko lituzkeela (langabezia-prestazioak eta -subsidioak). Horrela, EGABek beharrezkotzat jotzen du legean finantzaketa-iturriekin erlazionatutako artikulua berrikustea, legeak programa eta zerbitzuak garatzeko behar diren funtsen erabilera berma dezan.

Azkenik, EGABek positibotzat jo du kontratu irekien formula berria, zerbitzu bat ematean hainbat erakundek parte har dezaten; izan ere, enplegurako laguntzak kudeatzeko ohiko arazoetako bat laguntza-deialdien kudeaketa zailarekin dago erlazionatuta.

ITUN SOZIALAREN ETA HITZARMENEN ARAUKETA

Euskadiko Ekonomia eta Gizarte Arazoetarako Batzordeak, gainera, Gizarte Zerbitzuen Euskal Sisteman itun sozialaren eta hitzarmenen araubidea arautzen dituen Dekretu-proiektuari buruzko txostena egin du. Dekretuaren xedea sistema horretan itun-araubidea eta Gizarte Zerbitzuen hitzarmenak arautzea da, bai eta itunpeko ikastetxe pribatuen jarduteko baldintzak ere, gizarte-itunaren araubidearen oinarrizko alderdiak ezarriz, sartzeko betekizunak, gehieneko iraupena, itunak azkentzeko arrazoiak eta alderdien betebeharrak, batez ere.

Kontsulta-organoaren 14/22 irizpenak ohartarazten du ez dela ulertzen zein den gizarte-zerbitzuen garapen-ereduaren irudi orokorra, ezta ekimen pribatuak zerbitzu publiko horien kudeaketan duen parte-hartzearen irismena ere, eta horrek ziurgabetasun-egoera sortzen du. Era berean, testuak herri-administrazioei, hirugarren sektore sozialari eta merkataritza-hornitzaileei gizarte-zerbitzuen horniduran esleitzen dizkien rolek sektoreko hainbat eragile garrantzitsuren ordezkarien artean kezka eta harridura sakona eragiten dutela dio, eta bere iritziz beharrezkoa eta egokia den  eta 2008an egin zen Gizarte Zerbitzuei buruzko Legea indarrean sartzean aurreikusitako erregelamendu-garapenaren gehiena ez dela orain arte garatu.

Ildo horretan, Euskadiko Ekonomia eta Gizarte Arazoetarako Batzordea kezkatuta agertu da proposamena ez datorrelako bat zerbitzu horietako gehienak emanez administrazioekin lankidetzan aritzen diren erakundeekin, eta Eusko Jaurlaritzari eskatzen dio ahalegin bat egin dezala zerikusia duten eragile nagusiekin gauzak argitzeko eta adostasun sozial eta politikoa lortzeko, horrela, guztiek behar bezala ezagutzen eta onartzen duten gizarte-zerbitzuak garatzeko ereduaren barruan dekretu-proiektua berriro idazteko.

The post EGAB-ek enpleguaren euskal Lege-aurreproiektuari eta gizarte zerbitzuen euskal sisteman itun sozialaren eta hitzarmenen araubidea arautzen dituen Dekretu-proiektuari buruzko irizpena eman du appeared first on CES Vasco.

Euskadiko Ekonomia eta Gizarte Arazoetarako Batzordeak, Eusko Jaurlaritzako Berdintasun, Justizia eta Gizarte Politiketako Sailak egin duen “Euskadiko Hirugarren Sektore Sozialeko erakundeen errolda sortzen duen eta horien funtzionamendua arautzen duen Dekretu-Proiektuari” buruzko txostena egin du.

Dekretuaren xedea Euskadiko hirugarren sektore sozialeko erakundeen errolda publikoa sortzea eta haren funtzionamendua arautzea da, Euskadiko Hirugarren Sektore Sozialari buruzko maiatzaren 12ko 6/2016 Legearen 5. artikuluko legezko agindua betez. Helburua Euskal Autonomia Erkidegoan dauden hirugarren sektore sozialeko erakundeen kopurua eta osaera ezagutzea, eta Euskadiko hirugarren sektore soziala ezagutu, argitaratu, aztertu, planifikatu, antolatu eta sustatzeko tresna erabilgarria sortzea da.

Euskadiko Ekonomia eta Gizarte Arazoetarako Batzordeak ontzat jotzen du araua egin izana, eta beharrezkotzat jotzen du araua abian jartzea, dagoen legezko betebeharra betetzeko. Hala ere, kontseiluak aplikazio-eremuari buruzko atala berrikustea iradoki du, dokumentua errazago ulertzeko. Zehazki, testuan zein enplegu-zentro berezi aipatzen diren zehaztea proposatzen du, eta “birgizarteratze- eta laneratze-enpresa” terminoaren ordez “laneratze-enpresa” jartzea gomendatzen du, erakunde horiek arautzen dituzten araudietan bezala izendatzeko.

The post EGAB-ren Irizpena, Euskadiko hirugarren sektore sozialeko erakundeen errolda sortzen duen eta horien funtzionamendua arautzen duen Dekretu-proiektuari buruzkoa appeared first on CES Vasco.

Euskadiko Ekonomia eta Gizarte Kontseiluak Eusko Jaurlaritzako Berdintasun, Justizia eta Gizarte Politiketako Sailak egindako “Haurren eta Nerabeen Lege-aurreproiektuari” buruzko txostena egin du. Erantzunean, Kontseiluak egokitzat jo du izapidetzea, eta ontzat eman du izaera integraleko arau-esparru berria; izan ere, euskal ordenamendu juridikoan sakabanatze txikiagoa egoten lagunduko du, eta adingabeengan eragina duten bai estatu, bai autonomia mailako arauak interpretatzea eta aplikatzea erraztuko du.

Legegintza-ekimenaren xedea, haurren eta nerabeen gaiari, orokorrean, dagokionez Euskal Autonomia Erkidegoan erreferentzia-esparru juridiko berri bat eratzea da, EAEn bizi diren edo dauden adingabe guztiei antolamendu juridikoak (nazioartekoa, Europakoa eta estatukoa) aitortzen dizkien eskubide eta askatasun guztiak erabiltzeko aukera bermatzeko helburuarekin.

EGABen ustez, arau bermatzailea, integrala eta zeharkakoa da, haurrak eta nerabeak zuzenbideko subjektu gisa kontuan hartzen dituelako, eta hainbat termino biltzen dituelako, hala nola maila guztietako sustapena, lege-proiektu guztietan haurren gaineko eraginari buruzko txostenen nahitaezkotasuna edo haurren parte-hartzea. Hala ere, irizpenak dokumentua hobetzeko zenbait gogoeta jasotzen ditu.

Edukiari dagokionez, euskal organo aholku-emaileak haren hedadura murriztea gomendatzen du, erredundantziak saihestuz eta edukiaren zati bat erregelamenduzko garapenera baztertuz, zehaztu ez diren eta geroago arautu behar diren gaiekin egingo den bezala. Era berean, Haurren eta nerabeen betebeharrei buruzko Kapitulua kentzea proposatzen du, ez duelako logika juridikorik. Aldiz, beharrezkotzat jotzen du erreferentzia zehatzak eta haurrekin eta nerabeekin zerikusia duten beste lege batzuekiko loturak txertatzea, bai eta nerabezaroko berezitasunak kontuan hartzen dituen artikuluren bat sartzea ere.

Araua egiteari dagokionez, EGABek beharrezkotzat jotzen du haurren eta nerabeen benetako parte-hartzea sustatzea. Horretarako, berariazko gogoeta-, prestakuntza- eta eztabaida-guneak sartzea gomendatzen du, bai eta haiei laguntzeko behar diren baliabideak ere. Gainera, babes-sisteman dauden edo egon diren haurren parte-hartzea kontuan hartzea iradokitzen du.

Era berean, EGABen ustez, komenigarria eta gomendagarria da familia-, komunitate- eta hezkuntza-esparruetatik haurren eta nerabeen artean euren eginkizunak, betebeharrak eta erantzukizunak ezagutzea eta betetzea sustatzea, eta instantzia guztien erantzukizunak indartzea, erabateko autonomia lortu arte ondoan egoteko.

Haurrekin eta nerabeekin jarduten duten eragileak aipatuta, kontseiluak arauan eragileen arteko koordinazioa bermatzea gomendatzen du, ulermen eta aplikazio hobea lortzeko, eta dokumentuan jasotako figuren izenen bikoiztasuna berrikustea iradokitzen du, baita antzeko funtzioak dituzten organoen ugaritasuna ere. Sartutako figurei dagokienez, beharrezkotzat jotzen du Arartekoaren Haurren eta nerabeen bulegoari indar handiagoa ematea Legean.

Administrazio publikoari dagokionez, EGABek egokitzat jotzen du edozein motatako desgaitasun-kasu zehatzei laguntzeko behar diren baliabideak aurreikustea, desgaitasuna duten adingabeek administrazio publikoarekin berdintasunean harremanak izateko aukera izan dezaten. Era berean, prebentzioaren ikuspegitik, beharrezkotzat jotzen du administrazioen babes-ekintzaren barruan babes-politikak eta espazio seguruak diseinatzea, haurren eta nerabeen aurkako indarkeria-mota guztiak hautematea, jakinaraztea eta horien aurrean erantzutea bermatzeko. Horrez gain, haurren hazkuntzarekin eta pobreziaren aurkako borrokarekin erlazionatutako prestazioen unibertsaltasuna aitortzea eta legean sartzea eskatzen du, eta irisgarritasunarekin eta osasun-hazkundearekin zerikusia duten gizarte-baliabideekin lotutako arazoak sustatu beharko lituzkeela uste du.

Erabilitako hizkuntzari dagokionez, kontsulta-organoak hizkuntza inklusiboa erabiltzea eta aniztasunari arreta jartzea gomendatzen du, haurren eta nerabeen gaitasun, erritmo eta ikasteko estilo, motibazio, interes, egoera sozioekonomiko, kultural, linguistiko eta osasuneko desberdinei erantzuteko.

Era berean, kontseiluak ohartarazi duenez, hezkuntzarako eskubidea arautzen denean, ez dira gaitasun handiak dituzten adingabeak aipatzen, eta horiek ere berariazko egokitzapenak behar dituzte hezkuntza-arloan, desgaitasuna duten eta gizarteratzeko zailtasunak dituzten adingabeen premiak kontuan hartzen diren bezala.

Azken puntu horrekin lotuta, irizpenak ohartarazten du lege-aurreproiektuak ez duela neurri espezifikorik aurreikusten familia-erreferenterik gabeko jatorri migratzaileko haurren beharrei erantzuteko, eta, gainera, ez dituela landa-eremuan zerbitzuak eskuratzeko dauden oztopoak aipatzen. Gainera, kezkagarria da haur eta nerabe transen eskubideei eta askatasunei buruzko gaia nola jasotzen den, ez delako askatasun hori nola artikulatuko eta bermatuko den zehazten.

Azkenik, familia- eta kultura-aniztasunari erreferentzia egiteko erabilitako terminoak berrikusteko gonbita egin du, familia mota desberdinak islatzen dituzten terminoak erabiliz, hala nola guraso-figura(k), eta kultura-aniztasunari erreferentzia egiteko termino egokiagoak, hala nola, “kultura-nortasuna” edo “jatorrizko herrialdea”. Horren harira, gomendatzen du “adinez txikiak” erabiltzea, eta ez “adingabeak”, baldin eta oinarri juridikoa duen arrazoiren batengatik adingabea dela nabarmentzea beharrezkoa ez bada.

The post Euskadiko EGAB-ek Haurren eta Nerabeen Lege-Aurreproiektuari buruzko Irizpena eman du appeared first on CES Vasco.

• Emilia Málaga Pérez Euskadiko EGABeko presidentea, Iñigo Urkullu Renteria lehendakaria, George Dassis Europako Ekonomia eta Gizarte Arazoetarako Batzordeko presidente ohia eta Luis Miguel Pariza Castaños EGABeko kide ohia izan dira ekitaldiaren hasieran.

Emilia Málaga Pérez, Euskadiko Ekonomia eta Gizarte Arazoetarako Batzordeko presidentea; Iñigo Urkullu Renteria, Lehendakaria; George Dassis, Europako Ekonomia eta Gizarte Arazoetarako Batzordeko presidentea aurreko legegintzaldian; eta Luis Miguel Pariza Castaños, Euskadiko EGABeko eta Europako Ekonomia eta Gizarte Arazoetarako Batzordeko kide ohia, jardunaldi tekniko eta profesional baten hasieran izan dira gaur goizean, Europar Batasuneko immigrazio- eta asilo-politikei buruz hausnartzeko helburuarekin.

Foroa Euskadiko Artxibo Historikoan egin da, Bilbon, eta Euskadiko EGABeko, Europako EGABeko eta Eusko Jaurlaritzako 90 pertsona baino gehiago bildu dira bertan, baita Europako Ekonomia eta Gizarte Arazoetarako Batzordeko kide ohiak, beste Erakunde batzuetako kideak, adituak eta tokiko eragileak ere.

Europar Batasuneko erakunde aholku-emailea den Europako Ekonomia eta Gizarte Arazoetarako Batzordeak immigrazioaren eta asiloaren arloan Europako politika bateratua abian jartzeko beharra aldarrikatzen du, eta Estatu kideen artean politika hori garatzeko beharrezkoak diren akordioak lortzeko zailtasunaz ohartarazten du. Ildo horretan, Europako Ekonomia eta Gizarte Arazoetarako Batzordeak jatorrizko herrialdeekin batera kudeatuko den Europako politika erkide irekiagoa eta giza eskubideekiko errespetuzkoagoa garatzea beharrezkoa dela berretsi du.

Jardunaldian, parte-hartzaileek Europako immigrazio- eta asilo-politika bateratua lortzeko beharrezkoak diren oinarrien inguruan eztabaidatu dute. Horretarako, José Antonio Moreno Europako Ekonomia eta Gizarte Arazoetarako Batzordearen Mahaiko kideak Erakunde horren irizpenen eta Europako Foroaren lanen begirada kritikoa azaldu du. Bestalde, Laura Corrado Europako Batzordeko barne-gaietako zuzendaritza nagusiko unitateko buruak, immigrazio- eta asilo-politikarako Batzordea abian jartzen ari den agenda azaldu du, eta William Cockburn egoitza Bilbon duen Europako Laneko Segurtasun eta Osasunerako Agentziako (EU-OSHA) zuzendariak, Europako etorkinen lan-baldintzei buruzko azken azterlanak aurkeztu ditu.

Gainera, Euskadin aniztasuna kudeatzeko gauzatu diren tokiko politikei buruzko gogoeta egin da, azken urteotan arlo horretan EAEko, Espainiako eta Europako gizartean izandako hazkundearen ondorioz. Sarrera gisa, Eduardo Ruiz Vieytez Deustuko Unibertsitateko katedradun eta errektoreordeak Euskadiko, Espainiako eta Europako gizartea gero eta anitzagoa izateak dakartzan erronkak eta aukerak azaldu ditu.

Harrera-, integrazio- eta aniztasun-politiken garrantziari dagokionez, Beatriz Artolazabal Eusko Jaurlaritzako sailburuak herritartasunerako, immigraziorako eta asilorako euskal planaren helburuak aurkeztu ditu, eta Itziar Urtasun Bilboko Udaleko zinegotziak Bilbo kulturarteko hiria izeneko plana erakutsi du, Europako Kontseiluak sustatutako Cities Kulturarteko sareko kide gisa.

Bilkuraren amaieran, Christa Schweng Europako Ekonomia eta Gizarte Arazoetarako Batzordeko presidenteak eta Luis Planas Espainiako Gobernuko ministroak eta Europako Ekonomia eta Gizarte Arazoetarako Batzordeko idazkari nagusi ohiak streaming bitartez hitz egin dute, eta ekitaldiari amaiera emateko Emilia Málaga Euskadiko Batzordeko Presidenteak hartu du hitza.

Emilia Málaga Pérez Euskadiko EGABeko presidenteak gogorarazi duenez “immigrazioak ematen duen kultura-aniztasuna integratzen eta aprobetxatzen jakin duten herrialdeak dira, gaur egun, oparoenak, eta, beraz, politika publikoak zeharka eta modu koordinatuan bideratzen lagunduko duen eredu demografiko eta migratzaile orokorra ezinbestekoa da”.

The post EB-eko Immigrazio- eta Asilo-politikei buruzko jardunaldia egin dute gaur goizean Euskadiko eta Europako Ekonomia eta Gizarte Arazoetarako Batzordeek appeared first on CES Vasco.

Eusko Jaurlaritzako Ekonomiaren Garapen, Jasangarritasun eta Ingurumen Sailak prestatutako “Trantsizio Energetikoari eta Klimaren Aldaketari buruzko Lege Aurreproiektuaren” gaineko txostena ezagutzera eman du Euskadiko Ekonomia eta Gizarte Arazoetarako Kontseiluak. Erantzunean, Kontseiluak egokitzat jo du izapidetzea, zenbait oharrekin, aztertutako testua hobetzeko proposamenekin, besteak beste.

EGABek positibotzat jo du lege-aurreproiektua. Helburua Euskadin neutraltasun klimatikoa lortzeko esparru juridiko egonkorra ezartzea da, 2050ean beranduenez, bai eta lurraldeak klima aldaketarekiko duen erresilientzia areagotzea ere, ekitatea eta elkartasuna bermatuko dituen trantsizio bidezko, jasangarri, sozial, ekonomiko eta ingurumenekoaren bidez.

Irizpenak jasotzen duenez, arauaren helburua arau-esparrua Euskadiko errealitatera modu eraginkorrean egokitzea da, bai eta klima aldaketaren arloan nazioartean hartutako konpromisoak betetzea ere. Horretarako, arauak, zero emisio garbiko ekonomiarako trantsizio energetikoa egiteko estrategiak eta tresnak planteatzen ditu, euskal sozioekonomiaren errealitatea eta Euskadik etorkizunean izango dituen erronkak eta aukerak kontuan hartuta.

Euskal Kontseiluaren iritziz, merezimenduzkoa da arauak epe luzerako helburuei (2050) erantzunak ematea helburu duten planteamenduei heltzea, eta adierazi du bat datorrela arauaren ikuspegiarekin eta egiturarekin, bai eta arauaren oinarrian dauden parametroekin ere, bidezko trantsizioarekin, batez ere. Hala ere, Organo aholku-emaileak uste du bidezko trantsizioaren kontzeptuak garrantzia hartu beharko lukeela legearen zioen azalpenean, eta adierazten du enpleguari eustea eta enpleguaren kalitatea bidezko trantsizio horren funtsezko osagaietako bat dela.

Era berean, azpimarragarria iruditzen zaio ingurumen eta garapen ekonomiko eta sozial arloetako politikak aurrez aurre ez egotea, eta testuinguru sozial eta ekonomiko berri bat eraikitzeko helburuarekin elkartzea, bidezko aukerari eta tratuari dagokienez.

Erakunde aholku-emaileak ontzat jotzen du arauak administrazioen arteko lankidetza-gobernantza eta eragileen arteko lankidetza publiko-pribatua indartzeko duen grina, eta Euskal administrazio publikoaren eta Estatuaren arteko lankidetza eta Europar Batasunarekin lankidetza nabarmentzea iradokitzen du, dokumentuan presentzia handiagoa emanez. Gainera, partaidetza publikoaren esparruan, komenigarritzat jotzen du Herritarren Batzarren zeregina definitzea, informazio-kanal hutsak izango diren edo modu eraginkorrean parte hartuko duten zehaztuz, planetan ezarritako egoeraren eta helburuen ebaluazioan, proposamenen formulazioan edo beste behar batzuetan sartuz.

Obra, produktu eta zerbitzuen lizitazio publikoetan enpresek Karbono Aztarna izatea derrigorrezkoa dela eta, arauzko garapenean betebehar berri horren mende zein sektore eta enpresa-mota egongo diren zehazteko eskatzen du EGABek, eta irizpide gisa enpresaren tamaina kontuan hartzea iradokitzen du, txikienek ez baitute eskatutako estandarrak aplikatzeko ezagutza edo baliabide bera. Gainera, enpresa mota bakoitzak betebehar hori bere gain hartzeko modu iragankorrak bilatzea proposatu du.

Kontseiluak ohartarazi du zaila dela lizitazio publikoetara aurkezten diren enpresetan Karbono Aztarna ezartzea, bai produktuetan, bai zerbitzu eta horniduretan. Alde batetik, uste du produktuaren karbono-aztarna kalkulatzeko ezarritako 6 hilabeteko epea ez dela egokia, eta egokiagoa litzatekeela epea Erregistroaren gainean sortzen den Erregelamenduan zehaztea, une horretan kalkulu-metodologiak erabilgarri egongo direlako eta sektoreetan zein eragin izango duen hobeto jakingo dugulako.

Zerbitzu aztarnaren kalkuluaren kasuan, euskal organo aholku-emaileak iradokitzen du zaila dela etorkizuneko arauzko garapenetan eta pleguetan karbono aztarna kalkulatzeko behar diren datuak izatea; izan ere, gaur egun, enpresek erakundearen aztarna kalkulatzen dute, eta beren jarduera orokorraren eragina ezagutzen dute, ez zerbitzu jakin batena, eta are gutxiago hirugarrenek gauzatutako zerbitzua denean. Obren kasuan, gainera, obra gauzatu aurretik eraikuntza-enpresek ez dute Karbono Aztarna kalkulatzeko beharrezko daturik. Hori dela eta, xedapen hori berrikustea iradokitzen du, eta Erakundearen Karbono Aztarna eta horren ondoriozko Murrizketa Plana kontsumo errealen datuetan oinarrituta kalkulatzeko eskatzea proposatzen du, Estatuko Klima Aldaketaren 7/2021 Legearen hamabigarren xedapen gehigarriaren ildotik, Eraikuntza bezalako sektoreetarako batez ere.

Administrazio-izapideei dagokienez, EGABek uste du beharrezkoa dela euskal administrazioek etorkizuneko lege horretatik eratorriko diren administrazio-prozedurak ahalik eta azkarren eta era sinpleenean egiteko mekanismoak garatzea, izan ere, enpresen kezka handienetakoa izapidetzea da.

The post Euskadiko EGABek Transizio energetikoari eta Klimaren aldaketari buruzko Lege-Aurreproiektuaren gaienko Irizpena eman du appeared first on CES Vasco.

Euskadiko Ekonomia eta Gizarte Arazoetarako Batzordeak 2021eko Memoria Sozioekonomikoa aurkeztu du gaur goizean Bilbon, Emilia M. Málaga Euskadiko Ekonomia eta Gizarte Arazoetarako Batzordeko Presidentea eta Jon Barrutia txostena egiteko batzordeko Presidentea buru izan dituen ekitaldi batean.

Memoriaren aurkezpenean, EGABeko arduradunek 2021eko adierazle sozial eta ekonomiko nagusien errepasoa egin dute, eta txostenean jasotako kontsiderazioen laburpena ere azaldu dute. Kontsiderazio horiek kontuan hartu behar dira Euskadik Hiru Trantsizioei arrakastaz aurre egin diezaien eta herrialde digital, berde eta inklusibo bihur dadin.

Demografiaren arloari dagokionez, euskal organo aholku-emaileak agerian utzi ditu pandemiaren harira erabili dituen datu gogorrak, hala nola, orain arte ikusi gabeko heriotza kopuruak eta zer eragin izan duten bere kontsiderazioetan.

Bestalde, gogorarazi du EAEk erronka demografiko handi bati aurre egiten jarraitzen duela, jaiotza-tasa txikia eta biztanleriaren pixkanakako zahartzea direla eta, eta horrek agenda politikoan arreta berezia behar duela. Gainera, migrazio-saldo positiboek 2021ean hazkunde natural negatiboa konpentsatu zuten arren, ezinbestekoa da eredu demografiko eta migratzaile orokor bat, politika publikoak zeharka eta modu koordinatuan bideratu ahal izateko, eta 2030 Estrategia joera aldatzeko aukera paregabea dela adierazi du.

Ekonomiaren arloan, Kontseiluak adierazi du COVID-19ak eragindako gaixotasunari eusteko neurriak pixkanaka kentzeak jarduera ekonomikoaren dinamismo handiagoa ekarri zuela, eta jarduera-sektore guztiek, batez ere industria-sektoreak, eta eskariaren osagaiek hori baliatu dutela, baina oraindik ez dela pandemiaren aurreko jarduera-mailara iritsi. Halaber, iazko ekitaldiak enpresen susperraldi handia ekarri zuela adierazi du, 2020ko martxoa eta apirila bitartean galdu ziren enpresen % 64 berreskuratu baitziren.

Hala ere, Kontseilua kezkatuta agertu da inflazioaren egungo egoerarekin, horrek produkzio-jardueraren errentagarritasunean eta herritarren erosteko ahalmenean dituen ondorio negatiboak direla eta, eta egoera gainditzeko eta epe ertain eta luzera inflazio-espiral bat sortzea saihesteko akordioak lortzeko eta neurriak hartzeko beharra nabarmendu du.

Enpleguaren eta lan-harremanen inguruan, 2021ean enpleguak gora egin duela eta horrek pandemia aurreko egoera berreskuratzea ekarri duela nabarmendu du. Hala ere, Kontseiluak behin-behinekotasunaren eta lanaldi partzialeko enpleguaren gorakadari buruz ohartarazi du, 2021eko amaieran onartutako Lan Erreformaren ondorioen zain geratuz.

Bestalde, euskal organo aholku-emaileak ohartarazi du bi sexuetan eta adin-talde guztietan jarduera-tasa baxuek jarraitzen dutela, inguruko herrialdeekin alderatuta, eta adierazi du egoera hori bereziki kezkagarria dela emakumeen eta adinekoen kasuetan, bai eta kualifikazio txikiagoa duten pertsonen kasuan ere. Era berean, azpimarratu du langabezia handiena duten kolektiboei ematen zaien arretak ez duela egoeraren araberako arazoen eraginik jasan behar, eta beharrezkoa dela modu egonkorrean eta kalitatez laneratzea.

Gainera, Euskal Kontseiluak adierazi duenez, Enpleguko Politika Aktiboek (EPA) beste urte batez eutsi egiten diote euren garrantziari eta prestakuntza-eskaintza Europako funtsen helburu-eremuetara egokitzeko beharrari.

OSASUNA, BERRIKUNTZA, INGURUMENA ETA ENERGIA

Osasun-sistemari dagokionez, Kontseiluak adierazi du COVID-19ak osasun publikoa agenda politikoaren gailurrean jarri duela berriro, eta osasun-arreta ona bermatuko duten egitura nahikoak izateko beharra ikusi dela, baita prebentzio-mekanismoak ezartzearen, eta behar adina langile eta koordinazio-tresna izatearen garrantzia ere, osasun-shocken aurrean malgutasuna eta erresilientzia ahalbidetzeko. Etorkizunari begira, EGABek uste du osasun-ikerketak eta sistemaren digitalizazioak osasunaren prebentzioan eta hobekuntzan aurrera egiteko aukera emango dutela; horregatik, zenbait kolektiboren eten digitalari arreta berezia eskaintzeko eskatzen du.

Zientzia, Teknologia eta Berrikuntzaren arloan, organo aholku-emaileak Euskadik 2019an galdu zuen goi-mailako berrikuntzako eskualde kategoria berreskuratzea goraipatu du, baita RIS 2021ean eskualdeko bikaintasun-polotzat hartu izana ere. Hala ere, euskal enpresetan, ETEetan batez ere, berrikuntzaren aldeko apustua oztopatzen duten hainbat faktore daudela adierazi du, beste lehentasun batzuk eta eskariaren gaineko ziurgabetasuna, besteak beste, eta horri faktore ekonomikoak eta I+Gn egindako inbertsioa emaitzetara eramatea zailtzen dutenak gehitu behar zaizkio. Horregatik, EGABek bat egiten du ZTBPren 2030erako helburu operatiboetako batekin, hau da, “EAEko I+G+Ba emaitzetara bideratzea maximizatzea”.

Natur Ingurunearen eta Energiaren egoerari dagokionez, EGABek ohartarazi du EUSTATen Ingurumen Adierazleak erakutsi duen aurrerapena eskasa izan dela, eta, beraz, beharrezkotzat jo du garraiobide eta mugikortasun jasangarriagoetarantz aurrera egitea, etxeetako kontsumo-jarraibideak kontsumo jasangarrirantz aldatzea, energia berriztagarrien ekoizpena handitzea eta ekonomia zirkularra bultzatzea. Horretarako, kontzientziazio-lana egitea eta bizi-ohiturak aldatzea gomendatzen du, Berotegi-Efektuko Gasak eta hondakinak gutxitzea errazteko.

BIZI-BALDINTZAK, ETXEBIZITZA, HEZKUNTZA ETA SEKTORE PUBLIKOA

Bizi-baldintzei dagokienez, euskal erakunde aholku-emaileak nabarmendu du ez dela euskal biztanleriaren bizi-mailaren beherakada nabarmenik sumatu azken urtean (2020ko datuak), eta pobrezia- eta bazterketa-arriskuaren adierazle nagusiek aldeko bilakaerak dituztela pandemia izan arren, besteak beste, pandemia hasi zenean EAE hasierako posizio onean zegoelako.

Hala ere, kontseiluak energia-pobreziaren adierazleen bilakaera negatiboari eta behar bezala elikatzeko ezintasunari buruz ohartarazi du, pobrezia-egoeren % 40k baino gehiagok EBtik kanpoko atzerritar jatorriko biztanleengan duela eragina, eta beste % 15 lan egonkorrik gabeko emakumeak buru dituzten guraso bakarreko familiei dagokiela. Era berean, ohartarazi du pandemia dela eta, gizarte-babeseko sistemaren estaldurarik gabe bizitegi-bazterketako egoeran dauden pertsonak egon daitezkeela.

Gizarte-babesari dagokionez, organo aholku-emaileak adierazi du, arazoak arazo, gizarte-babeseko euskal sistemak bere estaldurari eutsi diola Europako herrialde nagusien pareko mailan, Europako BPGarekiko gastuaren ehunekora hurbilduz eta Estatuarena hobetuz, eta gizarte-babeseko sistema indartsua izatea beharrezkoa dela gogorarazi du. Gainera, azaldu duenez, Diru-sarrerak Bermatzeko Sistemari dagokionez, 2021ean berriro jaitsi da diru-sarrerak bermatzeko eta gizarteratzeko sistemaren prestazioak jasotzen dituzten titularren kopurua (-% 3,7, 2020arekin alderatuta), bereziki DSBE soldata-errentaren osagarri gisa jasotzen dutenen artean (% 15,7, 2020ko % 18aren aurrean).

Euskadiko etxebizitza-merkatuari dagokionez, euskal gizartearentzat erronka iraunkorra izaten jarraitzen duela nabarmentzen da. Ildo horretan, EGABek era positiboan baloratu du alokairu eskuragarriaren eta biztanlerik gabeko etxebizitzak mobilizatzearen alde egiten duen 2021-2024 aldirako Plan Zuzentzaile berria, eta azpimarratu du beharrezkoa dela etxebizitza eskuratzeko dauden programen berri ematea, sektore horretan inflazio-egoerak izan ditzakeen inplikazioez jabetzeaz gain, eta Europako Next Generation funtsek eskaintzen duten aukera aprobetxatu behar dela azpimarratu du.

Hezkuntzari dagokionez, Kontseiluak hobekuntza-arlo batzuetan lan egiteko eskatu du, eta horien artean, ezagutza-maila eta bikaintasuna arloko egokitasun-tasa ona eta ikasketak hautatzeko orduan dauden genero-desberdintasunak azpimarratu behar dira. Azken puntu horri dagokionez, EGABek ohartarazi du emakumeen presentzia urria dela laneratze-maila handiena duten familia profesional eta gradu askotan, eta egoera zuzentzeko beharrezkotzat jo du administrazio publikoek egin behar duten informazio- eta orientazio-estrategian sakontzea.

EAEko sektore publikoari dagokionez, EGABek nabarmendu du krisiaren ondoren finantza publikoak nabarmen suspertu direla, batez ere diru-bilketaren bilakaera positiboari esker. Era berean, zerga- eta aurrekontu-politika funtsezko zerbitzu publikoak (osasuna, gizarte-zerbitzuak, hezkuntza eta ikerketa) hobetzera bideratu behar dela adierazi du Kontseiluak, eta egoera zaurgarrienean dauden kolektiboetan prezioen hazkundeak duen presioa arintzeko erabili behar dela. Era berean, Europako Next Generation funtsak zerbitzu publikoak eta inbertsio publikoa eta pribatua indartzeko baliatu beharra berretsi du.

The post Euskadiko Ekonomia eta Gizarte Arazoetarako Batzordeak 2021eko Memoria Sozioekonomikoa aurkeztu du gaur goizean appeared first on CES Vasco.

Euskadiko Ekonomia eta Gizarte Arazoetarako Batzordeak Eusko Jaurlaritzako Ekonomiaren Garapen, Jasangarritasun eta Ingurumen Sailak egin duen “Euskal Autonomia Erkidegoan Jasangarritasunerako Hezkuntza sustatzeko Dekretu-Proiektuari” buruzko txostena egin du. Erantzunean, Kontseiluak egokitzat jo du izapidetzea, zenbait oharrekin, aztertutako testua hobetzeko proposamenekin, besteak beste.

EGABek egokitzat jotzen du Euskal Autonomia Erkidegoan jasangarritasunerako hezkuntza bultzatzea, indartzea eta sendotzea helburu duen dekretu-proiektu hori egitea, gure bizimoduak jasangarritasunaren kultura berrirantz igarotzea ahalbidetzeko. Izan ere, jasangarritasunerako hezkuntza funtsezko elementutzat hartzen du Kontseiluak, gizarteak ingurumenaren izaera uler dezan, eta kontzientzia, ezagutzak, balioak eta portaerak har ditzan, ingurumen-arazoen prebentzioan eta konponbidean parte hartzeko, bai eta ingurumenaren kalitatearen kudeaketan ere, modu arduratsuan eta eraginkorrean.

Halaber, Euskadiko EGABen ustez, jasangarritasunerako hezkuntza faktore estrategikoa da gaur egungo garapen-eredua jasangarritasunera eta ekitatera bideratzeko, eta era positiboan baloratzen du arauak hezkuntza sustatu eta garapen jasangarriaren printzipio edo oinarri nagusiekin lerrokatu nahi izatea, hezkuntza eraldatzaileaz hitz egin ahal izateko.

Testuinguru horretan, organo aholku-emailea bat dator jasangarritasunera bideratutako antolamendu- eta hezkuntza-kalitateko eredu berriak gauzatzeko bideak aktibatzea errazteko helburuekin, bai eta jasangarritasunerako ingurumen-hezkuntzako politikak indartzearekin ere, ingurumenaren babesean eta kontserbazioan herritarren erantzunkidetasunean aurrera eginez, jasangarritasunerako hezkuntzaren esparruan lankidetza-ekintzak sustatuz, koordinatuz eta gauzatuz, eta gizarte-ekintza eraldatzailea bultzatuz.

Arauaren edukiari dagokionez, EGABek adierazi du Dekretuaren helburuetako bat trantsizio ekologiko justua izan beharko litzatekeela, enpleguarekin eta haren kalitatearekin modu estuan erlazionatutako kontzeptua delako, eta hori funtsezkoa iruditzen zaio, mantentze hori jasangarritasunera bideratutako jarraibideekin uztartu ahal izateko. Dekretuak eratu nahi duen adituen eta jardunbide egokien trukerako ekosistemari dagokionez, kontseiluak dekretuan jasota ez dauden ingurumen-arloko edo ingurumen-hezkuntzako erreferentziazko erakundeak sartzeko aukera emango duen mekanismoren bat aurreikustea proposatzen du.

Irizpenak ohartarazten du lehen aipatutako ekosistemari forma ematen dion Berrikuntzarako, Gaikuntzarako eta Ezagutzaren Kudeaketarako Zentroaren osaerak ez duela LHko, Haur Hezkuntzako, Lehen Hezkuntzako eta Bigarren Hezkuntzako ikastetxe garrantzitsurik jasotzen, hala nola TKNIKA edo Berritzeguneak. Era berean, adierazi du kanpoan uzten dituela jasangarritasunerako hezkuntzan garrantzi handia izan dezaketen BC3 Basque Centre For Climate Change-Klima Aldaketa Ikergai bezalako erakundeak, eta, ondorioz, ekosistema horren helburua lortzeko, hau da, ikastetxeen eta jasangarritasunerako hezkuntzaren eremuko arloetan lan egiten duten beste eragile batzuen artean ezagutzak partekatzeko eta esperientziak trukatzeko sinergiak sortzea.

Ekosisteman inplikatutako figurei dagokienez, alde batetik, enpresak eta horiek lan-etapan betetzen duten zeregina kontuan hartzea gomendatzen du EGABek, kontuan hartuta dekretuak pertsona baten bizitza osoko ikaskuntza arautzen duela, eta pertsonak arduratzen direla jasangarritasunaren oinarriak euskal ekonomian txertatzeaz. Bestalde, euskal organo aholku-emaileak gizarte-eragileen inplikazioa eta zeregina argitzea komenigarritzat jotzen du, eta ez dirudi hori kontuan hartzen denik Berrikuntza eta Gaikuntzarako Zentroko Organo Kudeatzailearen osaketan, ezta Batzorde Teknikoan ere. Era berean, ez dira aintzat hartzen “Ikastetxe Jasangarria” zigilua aintzatesteko eta esleitzeko prozesuen Organo Kudeatzailearen osaeran, ezta aintzatespen-prozesu horien Ebaluazio Batzordean ere.

Arauan erabilitako terminoei dagokienez, Ekonomia eta Gizarte Arazoetarako Batzordeak, “hezkuntzaren arloan inplikatutako gizarte-eragileen” definizioaren ordez, “jasangarritasunean inplikatutako eragileak” terminoa definitzea iradokitzen du, Dekretuaren zereginean eragina izan dezaketen entitate, organismo eta erakundeak kontuan hartzeko. Gainera, Kontseiluak, zaharkituta geratu diren kontzeptu batzuk berrikustea iradokitzen du, hala nola, “etengabeko prestakuntza” edo “bizitza osoko hezkuntza” terminoak. Adierazi duenez, lehenengoa “bizitza osoko ikaskuntzagatik” edo “lan barruko prestakuntzagatik” ordezkatu da, eta bigarrena, berriz, “bizitza osoko ikaskuntzagatik”.

Era berean, irizpenak jasangarritasunerako hezkuntzaren barruan aipatutako gabeziak babesten dituzten datuak eranstea iradokitzen du; esate baterako, “jasangarritasunerako hezkuntzak unibertsitatez kanpoko hezkuntza-eremuan duen sarbide-maila hobetu egin daiteke”, eta, horrela, etorkizuneko ekimenetan aintzat hartu ahal izango da.

Azkenik, Euskadiko EGABen ustez, egokia eta koherentea da Jaurlaritzak beharrezko neurriak bultzatzea ikastetxeak hartzen dituzten eraikinak eraikin jasangarrien baldintzak bete ditzaten.

KOORDINAZIOA BESTE EUSKAL BERRIKUNTZA-ZENTRO BATZUEKIN

Jasangarritasunerako Hezkuntza arloko Berrikuntzarako, Gaikuntzarako eta Ezagutzaren Kudeaketarako Zentroari dagokionez, zentro berri hori Eusko Jaurlaritzako beste berrikuntza-zentro batzuekin koordinatzeko eta elkarreraginean aritzeko mekanismoa aurreikustea iradokitzen du EGABek, datozen urteetan ingurumen-hezkuntza sistema estrategikoa eraikitzeko, baliabideetan eraginkorra, kalitate teknikokoa eta hartzaileentzat balio erantsi handikoa.

Bestalde, etorkizuneko zentroaren helburuak ikusita, Kontseiluak zentroaren Kudeaketa Organoan eskola-komunitatearen ordezkaritza bat sartzea proposatu du, eta Batzorde Teknikoan, ikastetxeak, jasangarritzat jotzen ez direnak barne. Gainera, ingurumenean edo ingurumen-hezkuntzan erreferentzia diren beste erakunde publiko edo pribatu batzuk Batzorde Teknikoan sartzea gomendatzen du.

The post Euskadiko EGAB-ek EAEn jasangarritasunerako hezkuntza sustatzeko Dekretu-Proiektuari buruzko irizpena eman du appeared first on CES Vasco.

Euskadiko Ekonomia eta Gizarte Arazoetarako Batzordeak, Eusko Jaurlaritzako Osasun Sailak egindako Euskal Autonomia Erkidegoko 7 eta 15 urteko biztanleen aho-hortzen osasunaren arloko prestazio sanitarioari buruzko dekretu-proiektuaren gaineko txostena egin du. Erantzunean, Kontseiluak tramitazioa egokitzat jo du zenbait oharrekin, aztertutako testua hobetzeko proposamenekin, hain zuzen ere.

Dekretu-proiektuaren helburua EAEko osasun-sistemaren kontura osasun-laguntza publikorako eskubidea duten 7 eta urteko biztanleen aho-hortzen osasunaren arloko prestazio sanitarioaren edukia eta irismena ezartzea da, bai eta prestazio hori kudeatzeko modua ere.

Euskadiko EGABek adierazi duenez, duela gutxi, Osasun Ministerioaren Prestazio, Aseguramendu eta Finantzaketarako Batzordeak Osasun Sistema Nazionalaren (SNS), aho-hortzen osasunaren arloko zorro erkideko prestazioak eguneratu ditu. Bertan, prestazio berriei pixkanaka ekitea planteatzen da, 6 eta 14 urte bitarteko eta 0 eta 5 urte bitarteko biztanle-taldeekin, 2022ko abenduan eta 2023ko abenduan, hurrenez hurren, autonomia erkidego bakoitzean ezarritako plangintzaren eta arretaren arabera.

Euskal Autonomia Erkidegoari dagokionez, Euskal Aholku Batzordeak nabarmendu du PADIk jasotzen dituela dagoeneko SNSren zorro berrian 7 eta 14 urte bitarteko biztanleei zuzendutako prestazioak, eta, gainera, zorro erkidean jasotzen ez diren tratamenduak eskaintzen dituela, berariaz zorrotik kanpo dauden tratamendu batzuk barne.

Adierazi duenez, halaber, Dekretu Proiektuak Osakidetzako Haurren Hortzak Zaintzeko Programaren (PADI) egungo prestazioak hobetzen laguntzen du, baina adierazi du 7 urtetik beherako biztanleriak ere programaren xede izan beharko lukeela, aho-garapena desberdinak delako pertsona bakoitzarengan, eta uste du programak lortu beharreko helburuak bikoitza izan behar duela; alde batetik, adingabe guztien aho-hortzen osasuna bermatzea, hasieratik; eta bestetik, zerbitzua lehen arretatik ematea, umeei eta gazteei arreta ematen espezializatuta dauden Osakidetzako Aho-hortzetako Osasun Unitateetatik.

Testuinguru horretan, EGABek positibotzat jo du Eusko Jaurlaritzako Osasun Saileko Aseguramendu eta Osasun-kontratazio Zuzendaritzak eta Osakidetzako ordezkariek duela denbora gutxi Osakidetza aho-hortzen osasun-zorroa handitzeak dakartzan zerbitzu berriak ezartzeko gai dela ondorioztatu izana, Ministerioak zerbitzu horietako bakoitzerako ezarritako epeak betez. Osakidetzak baliabide propioekin emango ditu zerbitzu berri horiek.

The post EGAB-ek Euskal Autonomia Erkidegoko 7 eta 15 urte bitarteko biztanleentzako aho-hortzetako osasunaren arloko osasun-prestazioari buruzko Dekretu-proiektuaren gaineko irizpena eman du appeared first on CES Vasco.